Pola mañá, nun día chuvioso e con
moita néboa, estivemos no Museo Arqueolóxico de Santa Trega que acolle nos seus
fondos os obxectos que se foron encontrando nas excavacións realizadas no monte. As
súas pezas repártense por varias etapas históricas que abarcan desde o
Paleolítico ata a época romana. Hai picos, raspadores, muíños, cerámica,
moedas, esvásticas, torques, espadas, útiles de uso doméstico, etc.
Tamén visitamos o castro, que está
parcialmente reconstruído, con vivendas similares ás que habitaron os seus
poboadores orixinais. É unha das construcións deste tipo máis importantes e
mellor conservadas de Galicia.
Os nenos e nenas participaron nun
obradoiro onde coñeceron como é o traballo da olería e o uso do torno lento e
experimentaron como empregar diferentes técnicas decorativas no modelado de
cuncas e vasos de barro.
Pola tarde, demos un salto no tempo e trasladámonos a Baiona, que foi o primeiro porto de
Europa que recibiu a noticia do Descubrimento de América. O 1 de marzo de 1493
a Carabela Pinta, capitaneada por Martín Alonso Pinzón, atracou nestas augas.
Primeiro visitamos o Museo Casa da
Navegación, que contén documentos e pezas relacionadas coa historia da cidade, sobre todo referentes á navegación. Tamén destaca a réplica do Scarlet Knight,
ou Carabela do século XXI, un pequeno submarino que cruzou por primeira vez o
Atlántico sen tripulación.
Despois fomos ata a réplica da Carabela Pinta, que no seu interior alberga a reprodución de moitos elementos
da época do descubrimento, o que nos permite contemplar o barco tal e como
chegou a Baiona. Hai figuras que representan á tripulación e os indíxenas
americanos, obxectos de metal, plantas, alimentos, animais
exóticos... todo similar ao que se encontrou no novo mundo.